Bara kennin!

Lowena dhewgh, bobel vas! Hedhyw bara kennin. Pur esy ew, bes yth esov vy ort e gara! Bydh war! Na wra debry bara kennin dherag agas mos dhe weles bobel erel. Devnydhyow

  • Bara (Torth vara, lorghvara, torthellow bo neb bara esa ow cul sens. Ytho, na venje’ma usya bara torthganna)
  • manyn (unn bo diw lo veur rag pub torthel)
  • kennin (sqwachys) (unn darn rag pub torthel)
  • holan (Mar nag esowgh whi owth usya manyn sall)
  • erbys (Da ew genam usya kennin sevy ha persil. Erbys fresk ew gwell genam, bes sehys ew da enwedh.)
  • folen aluminium

Gwrewgh surhe bos an manyn orth tempredh rom. Whi a ell e dommhe e’n forn gorrdon, bes bydh war: Na wrewgh y asa enny re hir! Gorrewgh an kennin hag an erbys en an manyn (ha holan mar nag ew sall) ha gwrewgh aga habuly. Lemmyn, gwrewgh ragdommhe an forn dhe 180C. Gwrewgh trehow e’n bara, bes na drehewgh bys e’n goles. Res ew dhe’n bara remaynya unn darn. Gasewgh centimer ha hanter ynter an trehow. Gwrewgh drogura an manyn kennin yntredhan’ji. Gorrewgh folen aluminium adro dhe woles an bara rag surhe na venn frosa manyn teudh anodho e’n forn. Settyewgh an bara e’n forn rag whegh dhe eth mynysen. (Marj esowgh whi owth usya torth veur, gwrewgh sur bos teudh an manyn.)

An torthigow kens es mos a bervadh.

An torthellow kens es mos a bervadh e’n forn.

Spanakopitakia! – Spinachvara!

Wolcom dhewgh whi!

Ottomma kensa resayt an folen ma. Nag ew bes cot lemmyn rag e vos essa dhemm e scrifa en Kernowek. Hedhyw my a venn disqwedhes dhewgh whi en pana vaner whi a ell parujy spanakopitakia. An sort bianna. Bettegens, rag bos e gavos en essa (en Aberystwyth dhe’n lyha), yth esov vy owth usya toos delyow (= toos puff) en le toos phyllo.

Devnydhyow

  • fardel a doos delyow (disrewys)
  • spinach (distrehys)
  • keus feta (bo keus salad gwynn 😉 )
  • dew darn a gennin (trehys bo sqwachys)
  • holan
  • puber
  • oregano
  • dowr
  • unn oy (whyskys)

Marj ew rewys an spinach, gwrewgh y dommhe. Kettel vo disrewys, gorrewgh an spinach en croder ha gwasca an dowr enmes gans lo. Marj esowgh whi owth usya spinach fresk (na wrewgh ankevy e wolhy!), gwrewgh tommhe padel fria gans banna a olew ha treloubfria an spinach erna ve medhel.

Woja hemma gorrewgh an kennin ha browsy an keus feta yno. Gwrewgh addya oregano, puber ha holan dhe dast ha caboly puptra.

Rolyewgh an doos enmes erna ve folen tanow. Trehewgh an doos yntra pedregow a dhewdhek centimeter. Gorrewgh temmik an kemmysk spinach war bub pedreg.

Gwrewgh scubya banna an dowr war emlow pedreg, degea an pedreg may hella trihorn ha gwaska an emlow gans forgh. Gorrewgh an spanakopitakia war ganna pobas ha gwrewgh aga scubya gans an oy whyskys.

Gorrewgh anji en forn yw tommheys dhe ±180C seulabres. Pobewgh an spanakopitakia qwarter our ha gwrewgh aga checkya yna. Anji a vydh parys kettel vens gormowrek.